Skal ha forsøkt å tenne på naust: – Ikkje noko å leike med, seier Ove Godø
Torsdag kveld skal det ha vore gjort eit forsøk på å brenne ned eit naust som står ved det nye bustadfeltet Hjallismarka ved Flatebøen på Godøya.
Det er Ove Godø og Hjalmar Dyb som har varsla om dette i Facebook-gruppa «Godøya – tips og info».
– I går kveld mellom klokka 21 og 24 har det vore gjort forsøk på å brenne ned naustet. Politiet har få spor å gå etter, og vi ber derfor dei som har observert noko, eller har opplysningar, om å ta kontakt med politiet eller oss, skriv dei i gruppa.
Dei meiner brannen blei etablert midt inne i naustet og at det er gjort med hensikt.
– Ein brann i dette området kan få alvorlege konsekvensar med tanke på alt tørt gras. Vi takkar samstundes dei som bidrog til å avverje ein eventuell alvorleg situasjon, skriv dei vidare.
– Potensial for stor skade
Ove Godø seier til ØyBlikk at dei ser alvorleg på hendinga.
– Når det er så tørt i graset og terrenget kan ein kan jo trekke assosiasjonar til som skjedde på Sukkertoppen. Dette er ikkje noko å leike med. Tar det fyr i graset, er det potensial for stor skade, seier han.
Godø fortel at det skal ha vore ein nabo til utbyggingsfeltet som oppdaga brannen torsdag kveld.
– Han tok med seg brannsløkkar og sløkte det han klarte. No har politiet oppretta sak på forholdet. Er det ein brannstiftar gåande laus, må folk vere litt merksame og følgje litt med, oppmodar Ove Godø.
Samstundes blir det oppmoda om at ein ikkje oppheld seg ved naustet som er i dårleg forfatning. Ifølgje Godø skal naustet både sikrast og vedlikehaldast.
