Oppgang for ØyBlikk
Tysdag kom opplagstala for første halvår 2026. ØyBlikk har ein auke på 13 frå første halvår i fjor.
Auken tilsvarar rundt éin prosent for totalopplaget.
Det er det digitale opplaget som aukar mest for ØyBlikk, ein vekst på 16 prosent. Den digitale andelen er no oppe i 32 prosent av totalopplaget vårt.
Samstundes har komplettopplaget – papiravis med digital tilgang – gått ned med fem prosent. Dette følgjer trenden ein ser blant lokalavisene på landsbasis, der ein ser komplettnedgang på 12 prosent.
– Det er særleg den digitale veksten som held fram blant lokalavisene. Den samla digitale veksten er på over 12 prosent blant våre medlemsaviser, skriv Landslaget for lokalaviser (LLA) i ei pressemelding.
Total opplagsvekst i Norge er på nærare tre prosent, og heile sju av ti aviser kan vise til oppgang.
Mange av ØyBlikk sine abonnentar bruker ØyBlikk-appen for å lese nyheiter og få pushvarsel om nye saker.
Prosentvis endring aviser i Ålesund og omland, totalopplag:
- Sunnmørsposten: +5,24 prosent
- Haramsnytt: +2,82 prosent
- Sulaposten: +1,23 prosent
- Nyss: +1,13 prosent
- ØyBlikk: +1,03 prosent
- Bygdebladet: -0,34 prosent
- Vestnesavisa: -2,84 prosent
- Storfjordnytt: -3,23 prosent
