Åtvarar om mann som følgde etter jenter: – Det er veldig skremmande
To dagar på rad har to tenåringsjenter på Valderøya hatt skremmande opplevingar. Politiet er no informert om hendingane.
Fredag kveld i 19-tida stoppa to menn i det som skal vere ein grå fossilbil ved ei busslomme på Nordstranda på Valderøya. Den eine mannen kom ut av bilen og sprang mot ei jente som la på sprang heimover.
– Mannen sprang etter ho heilt til ho klarte å smette unna i carportanlegget i området og kome seg i hus, fortel Lillian Nærø Iversen som også har lagt ut ei melding om hendinga i Facebook-gruppa «Engasjert i Giske» for å åtvare andre.
– Politiet er informert om hendinga. Det er veldig skremmande, fortel Iversen til ØyBlikk.
Det skal også ha vore ei liknande hending på torsdag, nærare Rema. Då skal jenta raskt ha oppsøkt Rema og ringt til ein forelder.
Begge jentene som opplevde dette var tidleg i tenåra. Begge har også oppgitt omtrentleg same beskriving, ifølgje Iversen: Mannen som kom ut av bilen skal ha vore mørkt kledd og med hette over hovudet, normalt bygd, mørkt og moglegvis krøllete hår og med høgde rundt 170-180 cm. Vedkomande kan også vere av utanlandsk opphav, meiner jentene.
