Vigra IL blir truleg IL Valder 2

(Aprilspøk): Sidan Vigra ikkje maktar å stille lag til 6. divisjon på eiga hand i år heller, vil klubbleiinga inngå ein noko spesiell avtale med naboklubben IL Valder.

I år som i fjor skal A-lags-spelarane til Vigra opptre under namnet Vigra IL/Valder 2 i 6. divisjon avdeling 2.

Tidlegare denne veka spelte laget treningskamp mot Fjørtoft på Ravn stadion i Vatne.
– Ein kamp vi lett kunne ha vunne, endte med 3-5-tap, skriv Vigra IL på si Facebook-side.

Begeret rann over

Vigra/Valder 2 hadde tre debutantar i stallen under denne kampen – alle sjølvsagt henta inn frå Valder. Det fekk begeret til å flyte over for klubbleiinga.
– Dette er ikkje haldbart i lengda. Det er ikkje noko poeng å vere eit eige idrettslag når ein heile tida må hente spelarar frå naboklubbar som eigentleg er rivalar, sa ein ikkje namngitt representant for hovudstyret i Vigra IL etter kampen.
– Det blir som å heile tida gå over til naboen for å låne kaffi når du kunne ha kjøpt han sjølv, la han til.

Vil spreie seg

Etter det ØyBlikk kjenner til, skal saka opp i det ekstraordinære årsmøtet til Vigra IL i klubbhuset på Rota den 13. april. Då kan det ifølgje velinformerte kjelder bli snakk om å endre namn på Vigra IL til IL Valder 2. Det er leiinga i IL Valder positive til.
– Vi er absolutt ikkje framande for tanken! Å spreie IL Valder ut over fleire av øyane, har vi eigentleg kjempa for i mange år, seier ei Valdervoll-kjelde til ØyBlikk og legg til:
– Vi byr på kaffi kor som helst. Ein kan jo berre tenke seg kor IL Valder 3 og IL Valder 4 kan etablere seg i framtida.