Eit freistande turmål?

Kartverket har lansert ei ny teneste: «Finn den mest aude staden i kommunen». Og den mest aude staden i Giske? Mylloskjeret, så klart.

– Dreg du til villmarka for å kjæle med din indre Lars Monsen-spire eller samlar du på høge fjelltoppar og midtpunkt i kommunane? No kan du utvide samlelista di med dei mest aude punkta i kvar norske kommune, skriv Kartverket på sine nettsider etter lanseringa av noko som kanskje må seiast å vere ein artig funksjon.

Kartverket – som heilt tydeleg også har tid til å leike seg med ymse nødvendige eller unødvendige funksjonar – har lagd ei liste over kva punkt på land i kvar kommune som ligg lengst unna menneskeleg infrastruktur.

I Giske kommune er dette punktet Mylloskjeret.

– Vi har kravd landjord under beina, sånn at ein i det minste kan få planta eit flagg, uttalar Kartverket om korleis dei har plukka ut øydestadar.

Øydestadar kan fort endre seg dersom det til dømes blir vindkraftutbygging, nye hyttefelt eller nye skogsvegar.

– Det vil sjølvsagt vere delte meiningar om ein gammal sti, ein varde eller ein stake i sjøen er eit inngrep som forstyrrar villmark-opplevinga di. Men på øydestadane til Kartverket er du i alle fall så langt unna hus, veg og regulerte vassdrag som du kan komme, uttalar senioringeniør Martin Egger i Kartverket sin landsdivisjon.

God søndagstur på Mylloskjeret! ØyBlikk gir to Flax-lodd til den eller dei av lesarane våre som kan sende oss bilderapport frå planting av eit flagg på Mylloskjeret til redaksjon@oyblikk.no!