KI, undersøkande journalistikk og avisfellesskap

ØyBlikk er til stades på landsmøtet til Landslaget for lokalaviser (LLA) i Trondheim denne helga. Nyttige fagsesjonar og god avisprat er nokre av ingrediensane.

LLA er ein interesseorganisasjon for nesten 120 lokalaviser landet rundt, og arrangerer årets landsmøte over to dagar i Trondheim.

Temaa for fagsesjonane spenner frå KI og undersøkande journalistikk til redaksjonelle problemstillingar, presseetikk, gravejournalistikk og korleis ein når dei unge med relevant og godt nyheitsstoff.

Mellom anna er Samarbeidsdesken – eit unikt prosjekt som blir drive av LLA, NRK og Senter for undersøkende journalistikk i samarbeid med lokalavisene – til stades for å fortelje om erfaringar rundt datajournalistikk og såkalla researchpakker dei utarbeider for lokalavisene. ØyBlikk har førebels lagd tre saker med utgangspunkt i pakkene frå Samarbeidsdesken:

• Tre av desse sunnmøringane overlevde Titanic
• Går inn i jula med fleire hundre millionar kroner i usikra gjeld
• Tre millionar kroner til kulturminneprosjekt i Giske

Det kjem fleire spanande researchpakker frå Samarbeidsdesken framover, noko også ØyBlikk og lesarane vil nyte godt av.

Landsmøtet har over 200 deltakarar frå lokalaviser i heile Norge. Tvisyn-konsernet, som eig ØyBlikk, er også representert med deltakarar frå avisene Vestnesavisa, Midsundingen, Hustadvikingen, Aukranytt og Østhavet. Laurdag blir landsmøtet avslutta med festmiddag og prisutdelingar.