Mange diskusjonar på land vart det før heile bryggja var på plass. Her gamal og ny hamnesjef Kjell Nålsund og Martin Nordstrand i engasjerte, men godslege vendingar. (Foto: Arnfinn Rognmo)

Eldsjeler
Som så mange andre stader i Giske kommune, er det dugnadsinnsatsen frå alle eldsjelane som held lag og foreiningar i live. Småbåtforeininga på Giske har ei hard kjerne på 10-15 handfaste karar, med og utan traktor, som stiller opp på alle dugnader og arrangement i regi av foreininga.

Solid økonomi
Under årsmøtet sist torsdag møtte rekordmange medlemmar opp då mellom anna økonomi og anleggskostnader skulle handsamast og drøftast. Leiaren i foreininga, Arnstein Furnes, kunne berre konstatere at Giske småbåtforening truleg er den mest likvide av alle liknande foretak på øyane. Årets resultat før avskrivingar er nemleg på heile 430.650 kroner i pluss. Det er slett ikkje dårleg for ei småbåtforeining som nett har investert over 2,5 millioner i ny hamn og rår over eige naust og moderne slipp.

Møteplass i bygda
Hamnestova på Giske er i tillegg eit populært og triveleg festlokale som vert nytta gjennom heile året av båe private og ulike lag og foreiningar. Den tiltalande og frittliggjande plasseringa, gjer at Hamnestova er eit ynda lokale anten det skal feirast dåp, bryllaup eller haldast minnestund etter jordfestingar.

Stor stemning og heider
Alle som hadde vore med på den store dugnaden med å demontere gamlebryggja og leggje ut den nye vart heidra under årsmøtet. To medlemmar vart spesielt trekt fram. Det var Sæbjørn Volle, som har gjort ei utrøytteleg gjerning for båtfolket heilt sidan oppstarten og Martin Nordstrand, som gjorde ein framifrå innsats under heile hamnejobben før jul.
Nytt styre vart også valt. Arnstein Furnes, leiar, styremedlemmar Stig Giskegjerde, Oddvar Kjølsøy, Jon Arvid Giske og Martin Nordstrand, der sistnemnde også vart vald til ny hamnesjef.