FRIVILLIGDAG: Ernst Valderhaug, Frivilligsentralen, håper på stor interesse frå lag og organisasjonar på alle øyane i samband med Frivilligdagen i Idrettshallen.

Mangfald
I ein tilflyttingskommune som Giske er det eit særskilt behov for å synleggjere det frivillige arbeidet på alle øyane. –Kan hende er det mange nye innbyggjarar som har lyst til å engasjere seg i ein aktivitet. Og det er sikkert fleire av dei frivillige organisasjonane som har bruk for nye medlemmar, trur Valderhaug.
Han håper difor på stor oppslutnad rundt Frivilligdagen. –Så lenge du held på med ein aktivitet som er open for alle, er det også interessant for andre, meiner han. Og oppmodar dei som vil delta om å melde si interesse før fristen 15. februar.

Vise fram
Frivilligsentralen er med andre ord på jakt etter alle frivillige, frå idrettslag og historielag til kor og korps. Arrangørane opnar dørene til Giske kommunale idrettshall og vil leggje forholda til rette for at dei frivillige skal få vist seg fram på best muleg vis. Dei håper hallen skal vere stor nok til å romme alle som ønskjer å delta, men ser for seg at dei kan utvide arrangementet til to dagar dersom interessa er veldig stor.
–Vi håper òg at nokre av dei frivillige vil bidra med underhaldning, skyt Valderhaug inn.