SKULE: Skuleåret 2009/2010 byrja det så mange som 305 elevar ved Valderøy barneskule, 75 fleire enn skulebygget er dimensjonert for etter dagens normer.

Dagens skule
På oppdrag frå kommunestyret har oppvekstkomiteen laga ein rapport der skulestrukturen i Giske kommune vert vurdert. Rapporten skal framleggjast på kommunestyremøtet 9. februar. Skulestrukturutvalet har hatt ein knapp tidsfrist hengjande over seg, men dei har i tillegg til økonomi, forsøkt å også vurdere kvalitet, og det faglege og sosiale aspektet.
I drøftingane har utvalet konsentrert seg mest om to alternativ. Alternativ 1 er å behalde dagens struktur. Alternativ 2 er å samle dei eldste elevane på éin ungdomsskule. Løysinga dei ser som mest aktuell er å byggje på Valderøy ungdomsskule. Fordelar er årleg effektivisering og innsparing i drifta, ulemper er mellom anna auka skyssutgifter for frakt av elevar frå Godøya.
”Innsparinga vil kunne variere frå 1 til 2,5 millionar, avhengig av elevtal og klassestruktur”, skriv utvalet.
–Alternativ 2 vil føre til at Alnes skule vert nedlagt, og ein må byggje om Godøy skule for å gjere den om til ein rein barneskule, opplyser Dyb-Sandnes. Etter det leiaren opplyser til Øy-Blikk vart det under møtet i oppvekstkomiteen uttalt bekymring for kva som vil skje med utviklinga av Alnes om skulen forsvinn. –I ein vekstkommune som Giske føler vi dessutan det blir feil signal å sende å leggje ned ein skule, skyt han inn.

Ny ungdomsskule
Eit tredje alternativ er å byggje heilt ny ungdomsskule, noko skulestrukturutvalet vurderer som særs kostnadskrevjande og mindre aktuelt. Det vil truleg bety ei investering på 240-260 millionar kroner eller meir. Det skal dekkje ny ungdomsskule og oppgradering av 1959-bygget ved Valderøy barneskule, då 1. til 7. klassingane må ta i bruk dagens skule og ungdomsskulen, i staden for ein ny barneskule.
–For det første har vi brukt i overkant av 30 millionar kroner til å pusse opp Valderøy ungdomsskule. Skal den gjerast om til barneskule, vil det krevje heilt andre fasilitetar. For det andre har vi kome eit godt stykke på veg med planlegginga av ny barneskule, og det er sett av eit område til offentleg formål på Valderøya, uttalar Dyb-Sandnes. Han skyt inn at sjølv om ein vel å ha to ungdomsskular betyr ikkje det at ein ikkje kan samarbeide og utnytte ressursane betre.
–Til dømes kan ein dele på lærarar som underviser framandspråklege, forklarer leiaren i oppvekstkomiteen.