VINNARAR: Nyvoll Senior vann Båtcupen og fekk med seg den store vandrepokalen “Helge Godøs minnepokal”. Bak f.v. Stian Aamodt, Bård Erik Nyvoll, Sven Harald Nyvoll, Maron Pettersen og Birger Eilertsen. Framme f.v. Kjetil Nyvoll, ein ivrig Nyvoll-supportar og Magne Remmen.

Loran, Nesbakk, Veidar og Nyvoll Senior, heimehøyrande på Godøya, skulle saman med Atlantic Viking frå Giske, finne ut av kven som var best, og det resulterte i mange og jamne kamper. Ingen av kampane vart vunne med meir enn eitt mål, så spenninga var til stades heile tida.
Loran og Nyvoll møttest i finalen. Det var uavgjort ved full tid, men i ekstraomgangane klarte Birger Eilertsen å få inn det avgjerande målet, så Nyvoll Senior vart turneringsmeister.

Fotballgruppa i Godøy I.L. stod som arrangør av turneringa, og dei hadde alt på førehand stor tru på suksess og eit langt liv for turneringa. I tillegg til premiering av finalistane, vart det derfor også oppsett ein flott vandrepokal som meisteren skal behalde til neste turnering. Pokalen vart kalla ”Helge Godøs Minnepokal”, til minne om ein sentral medlem i fotballgruppa og idrettslaget, som dessverre gjekk bort så altfor tidleg.

Ut frå suksessen denne gongen er det neppe grunn til å tru anna enn at denne cupen har kome for å bli.

Av: Hans-Petter Godø