Englesong av Kor Tøft.

Fullsatt sal
Vigra skulemusikk og Valderøy skulekorps var fyrst ut. Deira musikkstykke vart veldig godt motekne av ein fullsett sal. I nokre av musikkstykka var det også song av to unge jenter. Gloria Kapako og Ayla Nordstrand imponerte stort med to flotte songstemmer. Etter ei lita pause med allsong og opplesinga av juleevangeliet fekk dirigent Oddveig Valderhaug og hennar Kor Tøft med unge songsjeler entre scena. Rett og slett englesong kunne konferansier Røssevold konstatere.

Deilig er jorden
Det evigunge Vigra og Valderøy ungdomsmusikk (VVUM) viste imponerande kvalitetar på sine instrument og avslutta sjølvsagt med songen ”Deilig er jorden”. Dirigent for VVUM, Terje Tafjord, tykte julekonserten var vellukka.
-Det var akkurat slik det skal vere. Mange unge aktørar som sette julestemninga. Dette er min andre sesong no og eg må seie eg vart imponert av dei gode solistane. Så ja, eg kjenner at julestemninga har kome, sa ein opplagd Terje Tafjord. Formann for Valderøy Skulekorps, Robert Skjong, sat også igjen med ein god følelse etter konserten.
-Ja, eg tykkjer det vart god julestemning, sa Skjong og fortsette. -Sjølv om det er mykje arbeid å sette i stand, går det veldig greitt når alle aktørane gjer slik som dei har sagt. Det at det er så mange aktørar og i tillegg er mykje publikum tykkjer eg er veldig kjekt, sa Skjong.
Ole Petter Vartdal Skjong frå Valderøy skulekorps tykte det var kjekt å vere med på julekonsert.
-Det var veldig kjekt å framføre, og eg kjem i julesteming av dette. Det er også ganske lærerikt fordi du lærer nye ting heile tida når du er med på slike ting, sa han.
Og for dei som har lyst å kome i endå betre julestemning, skal Vigra og Valderøy ungdomsmusikk ha konsert i Vigra kyrkje i morgon kveld.